ޔޫރަޕާއި އޭޝިޔާގެ ބައެއް ސަރަހައްދުތަކުން ރާއްޖެއައި ފަތުރުވެރިން އިތުރުވެއްޖެ

ޔޫރަޕާއި އޭޝިޔާގެ ބައެއް ސަރަހައްދުތަކުން ރާއްޖެ ޒިޔާރަތްކުރި ފަތުރުވެރިންގެ އަދަދު މިދިޔަ އަހަރުގެ ޖެނުއަރީމަހާއި އަޅާބަލާއިރު މިއަހަރު އިތުރުވެއްޖެއެވެ.
މިނިސްޓްރީ އޮފް ޓޫރިޒަމް އިން އާންމުކޮށްފައިވާ ތަފާސް ހިސާބުތައް ދައްކާގޮތުން ޖެނުއަރީމަހުގެ 1 ވަނަ ދުވަހުން 13 ވަނަ ދުވަހުގެ ނިޔަލަށް ރާއްޖެ ޒިޔާރަތްކޮށްފައިވަނީ 37926 ފަތުރުވެރިންނެވެ. މިދިޔަ އަހަރުގެ މި މުއްދަތުގައި ރާއްޖެ ޒިޔާރަތްކޮށްފައިވަނީ 72262 ފަތުރުވެރިންނެވެ. އެހެންކަމުން މިއީ %47.5 ދަށްވުމެކެވެ.

ޖުމްލަ ފަތުރުވެރިންގެ އަދަދު މިދިޔަ އަހަރުގެ މި މުއްދަތާއި އަޅާބަލާއިރު ދަށްވިނަމަވެސް ބައެއް މާކެޓްތަކުން ވަނީ ބޮޑު ކުރިއެރުމެއް ހޯދާފައިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. ވަކިވަކި މާކެޓްތަކުން އެންމެ ބޮޑު ކުރިއެރުމެއް ހޯދާފައިވަނީ އުޒްބަކިސްތާންއެވެ. 2020 ވަނަ އަހަރު ޖަނަވަރީ 13 ވަނަ ދުވަހުގެ ނިޔަލަށް އެ ޤައުމުން ރާއްޖެއަށް 145 ފަތުރުވެރިން އައިއިރު މިއަހަރުގެ މި މުއްދަތުގައި އެ ޤައުމުން ރާއްޖެއަށް ވަނީ 665 ފަތުރުވެރިން އައިސް %358.6 ކުރިއެރުމެއް ހޯދާފައެވެ.

2 ވަނައަށް އެންމެ ބޮޑު ކުރިއެރުމެއް ހޯދާފައިވަނީ ޔޫކްރެއިންއެވެ. 2020 ވަނަ އަހަރުގެ މި މުއްދަތުގައި އެޤައުމުން ރާއްޖެއަށް 142 ފަތުރުވެރިން އައިސްފައިވާއިރު މިއަހަރުގެ މި މުއްދަތުގައި ރާއްޖެ އައީ 3472 ފަތުރުވެރިންނެވެ. އެހެންކަމުން މިއީ %144.3 ކުރިއެރުމެކެވެ. ކަޒަކިސްތާން މާކެޓަކީވެސް މިއަހަރު ބޮޑު ކުރިއެރުމެއް ހޯދާފައިވާ އަނެއް މާކެޓެވެ. އެގޮތުން މިދިޔަ އަހަރުގެ ފުރަތަމަ 13 ދުވަހު އެޤައުމުން ރާއްޖެ އައިސްފައިވަނީ 917 ފަތުރުވެރިންނެވެ. ނަމަވެސް މިއަހަރު 2034 ފަތުރުވެރިން އައިސް %121.8 ކުރިއެރުމެއް ވަނީ ހޯދާފައެވެ.

މިދިޔަ އަހަރާއި އަޅާބަލާއިރު މިއަހަރު އެހެން ބައެއް މާކެޓްތަކުން ހޯދާފައިވާ ކުރިއެރުންތަކަށް ބަލާއިރު ރޯމެނިއާއިން %42.6 ކުރިއެރުމެއް، ރަޝިއާއިން %30.2 ކުރިއެރުމެއް، ބްރެޒިލް %11.1 ކުރިއެރުމެއް، އިންޑިއާއިން %8.1 އަދި ޗެކް ރިޕަބްލިކް އިން %7.7 ކުރިއެރުމެއް ހޯދާފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ ރަޝިއާއިންނެވެ. އެ ޤައުމުން ރާއްޖެއަށް 10000 އަށްވުރެ ގިނަ ފަތުރުވެރިން ވަނީ އައިސްފައެވެ. 2 ވަނައަށް އެންމެ ގިނަ ފަތުރުވެރިން ރާއްޖެ އައީ އިންޑިއާއިންނެވެ. އެ ޤައުމުން ރާއްޖެއަށް 5727 ފަތުރުވެރިން ވަނީ ރާއްޖެ އައިސްފައެވެ.

advertisement