ރާއްޖޭގައި އޮޕަރޭޓްކުރާ 2 ބައިކޮށްފަ އެއްބަޔަށްވުރެ ގިނަ ގެސްޓްހައުސް އަލުން ހުޅުވައިފި

ރާއްޖޭގައި އޮޕަރޭޓްކުރާ ގެސްޓްހައުސްތަކުގެ ތެރެއިން 50 އިންސައްތަ ގެސްޓްހައުސް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން ދީފިއެވެ.
ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސް ހިސާބުތައް ދައްކާގޮތުން މިހާތަނަށް 297 ގެސްޓްހައުސްއެއް ވަނީ އަލުން ހުޅުވައި ޙިދުމަތްދޭން ފަށާފައެވެ. ޓޫރިޒަމް މިނިސްޓްރީގައި ޖުމްލަ 580 ގެސްޓްހައުސް ރަޖިސްޓްރީކޮށް ހިންގާއިރު، މިހާރު 50 އިންސައްތައަށްވުރެ ގިނަ ގެސްޓްހައުސްތައް އަލުން ހުޅުވުމުގެ ހުއްދަ މިވަނީ ލިބިގެންގޮސްފައެވެ.
ޓޫރިޒަމް މިނިސްޓްރީން ރާއްޖޭގެ 14 އަތޮޅަކުން 48 ރަށެއްގެ ގެސްޓްހައުސްތައް ހުޅުވުމުގެ ހުއްދަ މިހާރު ވަނީ ދީފައެވެ. ގްރޭޓަރ މާލެ ސަރަހައްދުން މިހާތަނަށް 43 ގެސްޓްހައުސްއެއް ވަނީ ހުޅުވާފައެވެ. މިއާއިއެކު ގްރޭޓަރ މާލެ ސަރަހައްދުން 1204 އެނދު ވަނީ އޮޕަރޭޝަނަށް އައިސްފައެވެ. ވަކި ރައްތަކުގެ ތެރެއިން އެންމެ ގިނަ ގެސްޓްހައުސް ހުޅުވާފައިވަނީ ތޮއްޑޫއިންނެވެ. ތޮއްޑޫއިން ޖުމްލަ 29 ގެސްޓްހައުސްއެއް ވަނީ ހުޅުވާފައެވެ. ވަކިވަކި ރަށްތަކުގެ ތެރެއިން އެންމެ ގިނަ އެނދު އަލުން އޮޕަރޭޝަނަށް ގެނެސްފައިވަނީ މާފުށިންނެވެ. މާފުށިން ޖުމްލަ 1054 އެނދު އޮޕަރޭޝަނަށް ގެނެސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި މިހާރު 297 ގެސްޓްހައުސް ހުޅުވައި ޙިދުމަތްދޭން ފެށުމާއިއެކު ގެސްޓްހައުސްތަކުގައި ފަތުރުވެރިންނަށް ޙިދުމަތްދެމުން އަންނަ އެނދުގެ އަދަދު ވަނީ 5630 އަށްވުރެ އިތުރުވެފައެވެ.

އަތޮޅުތެރޭގެ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފައިވަނީ މިދިޔަ އޮކްޓޯބަރމަހުގެ 15 ވަނަ ދުވަހުއެވެ. އަދި މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ ދިނީ ޑިސެމްބަރުމަހުގެ 14 ވަނަ ދުވަހުއެވެ.

advertisement