ބ. ގޮއިދޫގެ ފެނާއި ނަރުދަމާ ނިޒާމް ޤާއިމްކުރުމުގެ މަސައްކަތް ފަށައިފި

ބ.ގޮއިދޫގައި ފެނާއި ނަރުދަމާ ނިޒާމު ޤާއިމުކުރުމުގެ މަސްރޫޢުގެ މަސައްކަތުގެ ދަށުން އެރަށުގައި އަޅާ ހޮޅި ނެޓްވޯކުގެ މަސައްކަތް ފަށައިފިއެވެ. މި މަޝްރޫޢުގެ މަސައްކަތް މިއަހަރުގެ މެދުތެރޭގައި ނިންމުމަށްވަނީ ތާވަލްކޮށްފައެވެ.
މި މަސައްކަތް ފަށްޓަވައިދެއްވީ ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު ހަސަން އަޙްމަދާއި އެމްޑަބްލިއުއެސްސީގެ ޗެއަރމަން އަޙްމަދު މަޢުސޫމާއި އެކުންފުނީގެ މެނޭޖިންގ ޑައިރެކްޓަރ ހަސަން ޝާހެވެ.
މި މަޝްރޫޢުގެ ދަށުން އެއަތޮޅު ގޮއިދޫގައި 15.9 ކިލޯމީޓަރުގެ ފެނުގެ ވިއުގައާއި 8.7 ކިލޯމީޓަރުގެ ނަރުދަމާގެ ވިއުގައެއް ޤާއިމްކުރާނެއެވެ.
ގޮއިދޫގެ ފެނާ ނަރުދަމާގެ މަސައްކަތް އެމްޑަބްލިއުއެސްސީއާ ޙަވާލުކޮށްފައިވަނީ 2019ވަނަ އަހަރުއެވެ. މިހާރު ދަނީ އެރަށުގައި ފެން ޕްލާންޓް ބަހައްޓާ ޢިމާރާތުގެ މަސައްކަތް ކުރަމުންނެވެ. ފެނާ ނަރުދަމާގެ މަޝްރޫޢުއާއެކު އެރަށުގައި ބޯފެން ރައްކާކުރާ ނިޒާމެއްވެސް ޤާއިމުކުރާނެއެވެ.
މި މަޝްރޫއު ފެށުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުން އެމްޑަބްލިއުއެސްސީގެ މެނޭޖިންގ ޑައިރެކްޓަރ ހަސަން ޝާހެވެ ވިދާޅުވީ، ޢަމަލީ މަސައްކަތް ނުފެށި ގިނަ ދުވަސް ވަނީ ޑިޒައިންއާއި އީއައިއޭ ހެދުންފަދަ މަސައްކަތްތައް ނިންމުމަށްކަމަށެވެ. ކޯވިޑްގެ ޙާލަތުގައި ބޮޑު މަޑުޖެހުމެއް އައިނަމަވެސް މިހާރު މަސައްކަތްކުރަނީ ކަނޑައެޅިފައިވާގޮތަށް މިއަހަރުގެ ޖޫންގައި މަސައްކަތް ނިންމުމަށްކަމަށް އޭނާ ވިދާޅުވިއެވެ.
ގޮއިދޫގެ ފެނާއި ނަރުދަމާ ނިޒާމުގެ މަސައްކަތް އެމްޑަބްލިއުއެސްސީއާ ޙަވާލުކޮށްފައިވަނީ 46މިލިއަން ރުފިޔާއަށެވެ. މި ޕްރޮޖެކްޓްގައި ގޮއިދޫގެ 153ގެއަށް ނެޓްވޯކް ގުޅުމަށްވަނީ ހަމަޖެހިފައެވެ.

advertisement