ރާއްޖެއައި ފަތުރުވެރިންގެ އަދަދު 43000 އަށްވުރެ އިތުރުވެއްޖެ

މިއަހަރުގެ މިހާތަނަށް ރާއްޖެއަށް 43000 އަށްވުރެ ގިނަ ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ
ޓޫރިޒަމް މިނިސްޓްރީން އާއްމުކޮށްފައިވާ އެންމެ ފަހުގެ ތަފާސް ހިސާބުތައް ދައްކާގޮތުން ޖެނުއަރީމަހުގެ 1 ވަނަ ދުވަހުން ފެށިގެން 15 ވަނަ ދުވަހާއި ހަމައަށް ރާއްޖެއަށްވަނީ 43481 ފަތުރުވެރިން އައިސްފައެވެ. ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 2899 ފަތުރުވެރިން އާދެއެވެ.
ވަކިވަކި ޤައުމުތަކުން ރާއްޖެއަށް އަންނަ ފަތުރުވެރިންގެ އަދަދުތަކަށް ބަލާލާއިރު، މި މުއްދަތުގައި ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ރަޝިޔާއިންނެވެ. މިމަހުގެ 13ވަނަ ދުވަހާއި ހަމައަށް އެޤައުމުން ރާއްޖެއަށް 10002 ފަތުރުވެރިން އައިސްފައިވާއިރު، ދެން އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ އިންޑިއާއިންނެވެ. އެޤައުމުން މި މުއްދަތުގައި ރާއްޖެއަށް 5727 ފަތުރުވެރިން އައިސްފައިވެއެވެ.
ތަފާސް ހިސާބުތައް ދައްކާގޮތުން 3 ވަނައަށް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ޔޫކްރެއިންއިންނެވެ. އެޤައުމުން ރާއްޖެއަށް 3472 ފަތުރުވެރިން އައިސްފައިވެއެވެ.
ކޯވިޑް19 ގެ ސަބަބުން ފަތުރުވެރިން ރާއްޖޭގައި ހޭދަކުރާ ދުވަހުގެ އަދަދުވެސް ވަނީ އިތުރުވެފައެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ފަތުރުވެރިން އާއްމުގޮތެއްގައި މިހާރު ރާއްޖޭގައި 9 ދުވަހުގެ ޗުއްޓީއެއް ހޭދަކުރެއެވެ.

ރާއްޖެއަށް އަންނަ ފަތުރުވެރިންގެ އަދަދުތަކަށް ލިބެމުންދާ ކުރިއެރުންތަކާއެކު ފަތުރުވެރިންނަށް ޙިދުމަތްދޭ ފެސިލިޓީތައްވެސް ދަނީ އަލުން ހުޅުވާލަމުންނެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިހާތަނަށް 582 ފެސިލިޓީއަކުން 42300 އެނދުވަނީ ފަތުރުވެރިކަމަށް ނެރެފައެވެ.

advertisement