ސީއެންއެންގެ ޗުއްޓީ ހޭދަކުރަން އެންމެ ކަމުދާ މަންޒިލްތަކުގެ ލިސްޓުގައި ރާއްޖެ!

ސީއެންއެންއިން އެކުލަވާލި، މިއަހަރުތެރޭ ޗުއްޓީއަށްދާން އެންމެ ކަމުދާ މަންޒިލްތަކުގެ ލިސްޓުގައި ރާއްޖެ ހިމެނިއްޖެއެވެ. ސީއެންއެންއިން އެކުލަވާލި މި ލިސްޓުގައި ދުނިޔޭގެ 21 މަންޒިލެއް ވަނީ ހިމަނާފައެވެ.
މި ލިސްޓުގައި ރާއްޖޭގެ އިތުރުން ދެން ހިމެނޭ ޤައުމުތަކުގެ ތެރޭގައި، ދުބާއީ، ސިންގަޕޯރ، ފްރާންސް އަދި ގްރީސް ހިމެނެއެވެ.
ގުދުރަތީގޮތުން ރާއްޖެ އުފެދިފައިވާގޮތުން ވަކިވަކި ރަށްތަކެއްގެ ގޮތުގައި އޮތުމުގެ ސަބަބުން ކޯވިޑްގެ ހާލަތުގައިވެސް ޗުއްޓީއަށްދާން އެންމެ ރައްކާތެރި މަންޒިލްތަކުގެ ތެރޭގައިވެސް ރާއްޖެ ހިމެނޭކަން ސީއެންއެންއިން ވަނީ ފާހަގަކޮށްފައެވެ.
މީގެކުރިންވެސް ރާއްޖެއަކީ ދުނިޔޭގެ ފަތުރުވެރިކަމުގައި މަޤްބޫލު މަންޒިލެކެވެ. އަދި ކޯވިޑް19 ގެ ހާލަތުގައިވެސް ރާއްޖޭގެ މަޤްބޫލުކަން ދުނިޔޭގެ އެކި ކަންކޮޅުތަކުގައި އަންނަނީ ބޮޑުވަމުންނެވެ. ގޫގަލް މެދުވެރިކޮށް ކުރިއަށްގެންދިޔަ އަދި އެކި ޤައުމުތަކުގައި ކުރިއަށްގެންދިޔަ ދިރާސާތަކުންވެސް ރާއްޖޭގެ މަޤްބޫލުކަން ވަނީ ހާމަވެގެންގޮސްފައެވެ. މިއަހަރު އެންމެ ގިނަ މީހުން ޗުއްޓީ ހޭދަކުރަން ބޭނުންވާ މަންޒިލްއަކަށްވެސް ރާއްޖެ ވަނީ ހޮވިފައެވެ.
ކޯވިޑް19 އަށްފަހު ރާއްޖޭގެ ބޯޑަރު މިދިޔަ އަހަރު ހުޅުވާލުމާއިއެކު މިހާތަނަށް ރާއްޖެއަށް ގިނަ އަދަދެއްގެ ފަތުރުވެރިން ވަނީ ޒިޔާރަތްކޮށްފައެވެ.

advertisement