ސްޓެލްކޯގެ އެކި މަސައްކަތްތަކަށް ދިވެހިން ހޯދަނީ

ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ހިންގާ އެކި ޕްރޮޖެކްޓުތަކުގައި މަސައްކަތްކުރާނެ ދިވެހިން ހޯދުމަށް ހުޅުވާލައިފިއެވެ.
“މިނިވަން މަސައްކަތްތެރިން”ގެ ގޮތުގައި އެ ކުންފުނިން ކުރިއަށް ގެންދާ އެކި ޕްރޮޖެކްޓުތަކުގައި މަސައްކަތްކުރުމަށް ބޭނުންވާ އުމުރުން 18 އަހަރާއި 45 އަހަރާ ދެމެދުގެ ދިވެހިންނަށް އެކަމަށް އެދި ހުށަހެޅުމުގެ ފުރުސަތު މިހާރު ވަނީ ހުޅުވާލައިފައެވެ.
މިކަމާ ގުޅޭ ގޮތުން ސްޓެލްކޯގެ ޖެނެރަލް މެނޭޖަރު އަލީ މުޖުތަބާ ވިދާޅުވީ، އެ ކުންފުނިން އައުޓްސޯސް ކޮށްގެން ބޭރު މީހުން ލައްވާ މަސައްކަތް ކުރުވުމުގެ ބަދަލުގައި ބޭނުންވަނީ މަސައްކަތުގެ މާހައުލަށް ނިކުންނަށް ބޭނުންވާ ދިވެހިންނަށް މި ފުރުސަތު ފަހިކޮށްދޭންކަމަށެވެ.
މަސައްކަތަށް ނިކުންނަ ފަރާތްތަކަކީ އަސާސީ ތައުލީމު ހުރި މީހުންތޯ އެ ކުންފުނިން ބަލާނެއެވެ. މިނިވަން މަސައްކަތްތެރިންގެ ގޮތުގައި މަސައްކަތަށް ނިކުންނަ މީހުންނަށް ދުވަހު މުސާރައަކަށް މަސައްކަތުގައި ހޭދަކުރާ ވަގުތަށް ބަލާފައި 100 ރުފިޔާ އާއި 250 ރުފިޔާއާއި ދެމެދުގެ އެލަވެންސެއް ދޭއިރު ކޮންމެ ދުވަހަކު ކޮއްތު ފައިސާ އަށްވެސް އިތުރު 175 ރުފިޔާ ދޭނެއެވެ.
މިނިވަން މަސައްކަތްތެރިންގެ ގޮތުގައި ސްޓެލްކޯގެ މަސައްކަތުގައި ބައިވެރިވާން އެދޭ ފަރާތްތަކުން ފޯމު ފުރިހަމަކުރުމަށްފަހު ހުށަހެޅުމުން އެކަމާ ގުޅޭ ދަފްތަރުގައި އެމީހަކު ރެޖިސްޓްރީ ކުރާނެއެވެ. މި މަހުގެ 31 ގެ ނިޔަލަށް މި ދަފްތަރުގައި ރެޖިސްޓްރީ ވުމަށް ވަނީ ފުރުސަތު ހުޅުވާލައިފައެވެ. ސްޓެލްކޯގެ ކައުންޓަރުންނާއި އެ ކުންފުނީގެ ވެބްސައިޓު www.stelco.com.mv އިން ފޯމު ޑައުންލޯޑު ކުރެވޭނެއެވެ.

advertisement