ތިލަފުށީ ފަޅުގެ ބާކީބައި ހިއްކުމަށް ދިރާސާ ކޮށްދޭނެ ބަޔަކު ހޯދަނީ

ތިލަފުށީ ފަޅުގެ ބާކީއޮތް ސަރަޙައްދު ހިއްކުމުގެ މަޝްރޫއެއް ކުރިއަށްގެންދަން ބޭނުންވާ ދިރާސާގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)އިން ފަށައިފިއެވެ. މި މަސައްކަތުގައި ތިލަފުށީ ފަޅުން ޖުމްލަ 138 ހެކްޓަރު ހިއްކުމަށްވަނީ ޕްލޭންކޮށްފައެވެ.

އެޗްޑީސީއިން މިހާރުވަނީ ތިލަފުށީ ފަޅު ހިއްކުމާގުޅޭ ކުރެހުންތައް ތައްޔާރުކުރުމާއި ތިމާވެއްޓަށް އަސަރުކުރާ މިންވަރު ބަލާ ރިޕޯޓް ތައްޔާރުކުރާނެ ބަޔަކު ހޯދުމަށް އިޢުލާންކޮށްފައެވެ.
މާލެ ކައިރީ ބޮޑު ފަޅެއްގެ ގޮތުގައި އޮތް ތިލަފަޅު، ފުރަތަމަ ފަހަރަށް ހިއްކާފައިވަނީ 1991ވަނަ އަހަރުއެވެ. 2016 ވަނަ އަހަރު ތިލަފުށީ އިންޑަސްޓްރިއަލް ޒޯންގެ ނަމުގައި 22ހެކްޓަރުގެ ސަރަޙައްދެއްވަނީ ހިއްކާފައެވެ. މި ސަރަޙައްދާ ތިލަފުށިން ފުރަތަމަ ހިއްކި ސަރަޙާއްދު ގުޅާލާފައިވަނީ ކޯޒްވޭއަކުންނެވެ. އިންޑަސްޓްރިއަލް ޒޯން ބޭނުންކުރަނީ ވިޔަފާރިތަކުން ގުދަންކުރުމުގެ މަސައްކަތްކުރުމަށެވެ. އަދި ކުނި މެނޭޖްކުރުމުގެ އިތުރަށް، ވިޔަފާރިތަކަށް ގުދަން ކުރުމަށް ބިން ދޫކުރުމާއި، އެކި ވިޔަފާރިތަކުން ޢަމަލީ މަސައްކަތްކުރުމަށްވެސް ގިނަ ބިންތަކެއް ތިލަފުށިން ވަނީ ދޫކޮށްފައެވެ.

advertisement