އެމްއެމްޕީއާރުސީން 4 މާކެޓެއްގައި ރާއްޖެ އިޝްތިހާރުކުރަން ފަށައިފި

އެމްއެމްޕީއާރުސީން އެކްސްޕީޑިއާއާއެކު 4 މާކެޓެއްގައި ރާއްޖެ އިޝްތިހާރުކުރުމަށް ކެމްޕެއިނެއް ފަށައިފިއެވެ. މި ކެމްޕެއިންގެ މަޤްސަދަކީ ދިވެހިރާއްޖެ އަކީ ގުދުރަތީ ގޮތުން ޖަޒީރާ ރަށްތަކެއްގެ ގޮތުގައި އުފެދިފައިވާ އަދި ފަތުރުވެރިން ޗުއްޓީ ހޭދަކުރުމަށް އެންމެ ހިތްގައިމު މަންޒިލްގެ ގޮތުގައި އިޝްތިހާރުކުރުމެވެ.
މި ކެމްޕެއިންގައި ރާއްޖެ އިޝްތިހާރުކުރާނީ ރަޝިއާ، އިންޑިއާ، މެދުއިރުމަތި އަދި ޗައިނާގެ މާކެޓްގައެވެ. މި ކެމްޕެއިން ކުރިއަށްދާނީ ހަތަރު މަސްދުވަހަށެވެ.
އެކްސްޕީޑިއާއެކު ކުރިއަށްގެންދާ މި ކެމްޕެއިން 23 މިލިއަނެއްހާ މީހުންނަށް ފޯރާނެ ކަމަށް އެމްއެމްޕީއާރުސީން ލަފާކުރެވެއެވެ. ޗުއްޓީ ހޭދަކުރުމަށް ދަތުރުކުރަން މަންޒިލްތައް ހޯދަމުން އަންނަ މީހުންނަށް އަމާޒުކުރެވިގެންދާ މި ކެމްޕެއިންގައި ދިވެހިރާއްޖެއަކީ ޗުއްޓީ ހޭދަކުރަން ހިތްގައިމު މަންޒިލެއް ކަމުގައި ހާމަކޮށްދޭނެއެވެ. މީގެއިތުރުން މި ކެމްޕެއިންގެ ތެރެއިން މިފަހުން ދިވެހިރާއްޖެއަށް ލިބިފައިވާ ކާމިޔާބީތަކުގެ ވާހަކަތައްވެސް ހިއްސާކުރެވޭނެއެވެ.
އެގޮތުން ވޯލްޑް ޓްރެވަލް އެވޯޑްސްގެ މިދިޔަ އަހަރު ދުނިޔޭގެ އެންމެ މަގުބޫލު ފަތުރުވެރިކަމުގެ މަންޒިލްގެ އެވޯޑާއި ދިވެހިރާއްޖެއަކީ ރައްކާތެރި ފަތުރުވެރި މަންޒިލެއްގެ ގޮތުގައި ކަނޑައަޅައި ވޯލްޑް ޓްރެވަލް އެންޑް ޓުއަރިޒަމް ކައުންސިލް، ޑަބްލިޔު.ޓީ.ޓީ.ސީން ދީފައިވާ ސޭފް ޓްރެވަލް ސްޓޭޕްމް އާއި މުޅި ދުނިޔޭގައިވެސް އަލަށް ލޯންޗްކުރެވުނު މޯލްޑިވްސް ބޯޑަރ މައިލްސް ޕްރޮގްރާމްގެ އިތުރުން އެލައިޑް އިންބައުންޑް އިންޝުއަރެންސްގެ މައުލޫމާތު ހިމެނެއެވެ. އަދި ދިވެހިރާއްޖޭގައި ފަތުރުވެރިންނަށް ތަޖުރިބާކުރެވެން ހުންނަ ހަރަކާތްތައްވެސް ފަތުރުވެރިން ޝައުގުވެރިކުރުވުމަށް ދައްކާލެވިގެންދާނެއެވެ.

އެކްސްޕީޑިއާ އަކީ ދަތުރުކުރާ ފަރާތްތަކަށް ފަސޭހަކަމާއެކު ދަތުރު ޕްލޭންކޮށް، ވެކޭޝަން ޕެކޭޖްއާއި ފްލައިޓް އަދި ހޮޓާ އަދި ކްރޫޒް ފަދަ ތަކެތި އޮންލައިންކޮށް ބުކްކުރުމުގެ ހުރިހާ ހިދުމަތެއް ދެމުން އަންނަ ދުނިޔޭގެ އެންމެ ކުރިއަރާފައިވާ އެއް ޓްރެވަލް ބްރޭންޑެވެ.

advertisement