ރާއްޖެ އާއި އިނގިރޭސިވިލާތާއި ދެމެދު ސްރީލަންކަން އެއަރލައިނުން އަލުން ދަތުރު ފަށަނީ

ރާއްޖެ އާއި އިނގިރޭސިވިލާތުގެ ލަންޑަނާ ދެމެދު އަނެއްކާވެސް ދަތުރުތައް ފެށުމަށް ސްރީލަންކަން އެއާލައިންސްއިން ތައްޔާރުވެއްޖެ އެވެ.
އަންނަ މަހުގެ 13 ވަނަ ދުވަހުން ފެށިގެން އިނގިރޭސިވިލާތުގެ ލަންޑަނާއި މާލެ އާއި ދެމެދު ސީދާ ދަތުރުތައް ފަށާނެ ކަމަށް ސްރީލަންކަން އެއަރލައިނުން ވަނީ ބުނެފައެވެ. މި ދަތުރުތައް ކުރާނީ ހަފްތާގެ ބުދަ އަދި އާދިއްތަ ދުވަހު އެވެ.
ރާއްޖޭގެ ބޯޑަރު ހުޅުވާލިފަހުންވެސް ސްރީލަންކަން އެއަރލައިނުން ވަނީ ރާއްޖެއާއި ލަންޑަންއާއި ދެމެދު ސީދާ ދަތުރުތައް ބާއްވައިފަ އެވެ. ނަމަވެސް މި ދަތުރުތައް ހުއްޓާލާފައިވަނީ އިނގިރޭސިވިލާތުގައި ހަލުވިކަމާއެކު ކޮވިޑް19 ފެތުރެން ފެށުމާއެކުގައެވެ.
ސްރީލަންކަންއިން ރާއްޖެއާއި ލަންޑަނާއި ދެމެދު ފަށާ ދަތުރުތަކުގެ އެއްކޮޅު ޓިކެޓުގެ އަގަކީ 1120 ޑޮލަރެވެ.
އިނގިރޭސިވިލާތަކީ ރާއްޖޭގެ ފަތުރުވެރިކަމަށް މުޙިއްމު ޤައުމެކެވެ. މިދިޔަ އަހަރުތެރޭ ރާއްޖެއަށް ތިންވަނަ އަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ އިނގިރޭސިވިލާތުންނެވެ. އެގޮތުން އަހަރު ނިމުނުއިރު 52720 ފަތުރުވެރިންވަނީ އިނގިރޭސިވިލާތުން ރާއްޖެއަށް އައިސްފައެވެ.

advertisement