އެންމެ ގިނަ ފަތުރުވެރިން ރާއްޖެއައީ އެމިރޭޓްސްގެ ފްލައިޓްތަކުގައި

އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން ދަތުރުކޮށްފައިވަނީ އެމިރޭޓްސްގެ ފްލައިޓުތަކުގައިކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން ނެރޭ ‘މޯލްޑިވްސް ޓޫރިޒަމް އަޕްޑޭޓު’ ރިޕޯޓުގައިވާގޮތުން މިމަހުގެ ފުރަތަމަ 18 ދުވަހުގެ ތެރޭގައި ރާއްޖެއަށް އެމިރޭޓްސްގެ ފްލައިޓުތަކުގައި 11504 ފަސިންޖަރުން ވަނީ ދަތުރުކޮށްފައެވެ. މިއީ 134 ފްލައިޓު މޫވްމަންޓެވެ.

އެމިރޭޓްސްއިން ދަނީ ހަފްތާއަކު 7 ދަތުރު ރާއްޖެއަށް ބާއްވަމުންނެވެ. އެމިރޭޓްސްއިން ރާއްޖެއަށް ދަތުރުތައް ބާއްވަނީ ދުބާއީއާއި ރާއްޖެއާ ދެމެދުއެވެ.
ރާއްޖެއަށް މި މުއްދަތުގައި ދެވަނައަށް އެންމެ ގިނަ އަދަދަކަށް ފަތުރުވެރިން ދަތުރުކޮށްފައިވަނީ ޤަތަރު އެއަރވޭސްގެ ފްލައިޓުތަކުގައެވެ. އެގޮތުން ރާއްޖެއަށް އެއެއަރލައިންގެ ފްލައިޓުތަކުގައި 6951 ފަސިންޖަރުން ވަނީ ދަތުރުކޮށްފައެވެ. ޤަތަރު އެއަރވޭސްއިން ރާއްޖެއަށް ދަތުރުތައް ބާއްވަނީ ޤަތަރުގެ ވެރިރަށް ދޯހާއިން ސީދާ ވެލާނާ އިންޓަރނޭޝަނަލް އެއަރޕޯޓަށެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް މިހާރު ދަތުރުތައް ބާއްވަމުންދަނީ 27 އެއަރލައިންއަކުނެވެ.
ރާއްޖެއަށް އޮޕަރޭޓްކުރާ އެއަރލައިންތަކުގެ އަދަދުތަކަށް ލިބެމުންދާ ކުރިއެރުންތަކާއެކު ރާއްޖެއަށް އަންނަ ފަތުރުވެރިންގެ އަދަދުވެސް ދަނީ އިތުރުވަމުންނެވެ. ތަފާސް ހިސާބުތައް ދައްކާގޮތުން މިމަހުގެ ފުރަތަމަ 21 ދުވަހު ރާއްޖެއަށް 60581 ފަތުރުވެރިން ވަނީ އައިސްފައެވެ.

advertisement