ކޯވިޑް ލޯނު ނުލާ އެސްއެމްއީ ބޭންކުން 420 މިލިއަން ރުފިޔާގެ ލޯނު ދޫކުރި

ކޯވިޑް ލޯންތަކުގެ އިތުރުން މިދިޔަ އަހަރު އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން، އެސްޑީއެފްސީން 420 މިލިއަން ރުފިޔާގެ ލޯނު ދޫކޮށްފައިވާކަމަށް އެ ބޭންކުން ބުނެފިއެވެ.

އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަންގެ ތަފާސް ހިސާބުތަކަށް ބަލާއިރު، މިދިޔަ އަހަރު ކޯވިޑް ވިޔަފާރިގެ އެހީ ލޯނުގެ އިތުރުން، އެސްޑީއެފްސީން ވަނީ 305 ފަރާތަކަށް 420 މިލިއަން ރުފިޔާގެ ލޯނު ދޫކޮށްފައިވެއެވެ. މީގެތެރެއިން އެންމެ ގިނަ ލޯނު ދޫކޮށްފައިވަނީ ކޮމާޝަލް ވިޔަފާރިތަކަށެވެ. އެއީ ލޯނު ދިން ޖުމްލަ ފަރާތްތަކުގެ %39.7 އެވެ.
ދެވަނަ އަށް އެންމެ ގިނައިން ލޯނު ދޫކޮށްފައިވަނީ ފަތުރުވެރިކަމާއި ގުޅުންހުރި ވިޔަފާރިތަކަށެވެ. އެއީ %18.7 އެވެ. މަސްވެރިކަމުގެ ދާއިރާ %14.4 ލޯނު އަދި ދަނޑުވެރިކަމުގެ ދާއިރާއިން %5.2 ލޯނު ދޫކޮށްފައިވާކަމަށް އެސްޑީއެފްސީގެ ތަފާސްހިސާބުތަކުން ދައްކައެވެ.

advertisement

މިލޯނުތަކުގެ އިތުރުން ކޯވިޑް-19ގެ ސަބަބުން ކުރިމަތިވި މާލީ ދަތިކަމުން އަރައިގަތުމަށް، 2205 ފަރާތަކަށް، 381 މިލިއަން ރުފިޔާ އެސްޑީއެފްސީން ވަނީ ދޫކޮށްފައެވެ.
އެސްޑީއެފްސީއަކީ ކުދި ފަންތިއާއި މެދު ފަންތީގެ ވިޔަފާރިތަކަށް ލޯނު ދޫކުރުމަށް މި ސަރުކާރުން އުފެއްދި ބޭންކެކެވެ. މި ބޭންކުގެ ދަށުން މިހާތަނަށް ގިނަ އެސްއެމްއީތަކަކަށް ވަނީ އެހީތެރިކަން ފޯރުކޮށްދީފައެވެ.